“Эерэг хандлагыг төлөвшүүлж, Ээлтэй орчинг нэмэгдүүлье” уриан дор ХБХХЕГ-аас нийслэлийн 9 дүүрэгт тус агентлагийн нэрэмжит Тугийг өртөөчлөн аялуулж байгаа билээ. 2019 онд Чингэлтэй дүүргээс гаргаагаа эхэлсэн Туг аялуулах аян одоо Сүхбаатар дүүрэгт үргэлжилж байна.

            Аяны хүрээнд Сүхбаатар дүүрэг хөгжлийн бэрхшээлийн чиглэлд хэд хэдэн ажлыг хэрэгжүүлж ажиллажээ. Тухайлбал тус дүүргийн Засаг даргын захирамжаар яаралтай эмчилгээ, хагалгаа хийлгэх шаардлагатай, хөгжлийн бэрхшээлтэй, эмзэг бүлгийн 4 иргэнд 3 сая төгрөгийн буцалтгүй тусламж үзүүлсэн байна.  Мөн хөгжлийн бэрхшээлтэй иргэдийн үйлдвэрлэсэн бараа, бүтээгдэхүүнийг сурталчлах, борлуулахад дэмжлэг үзүүлэх зорилгоор Хөдөлмөр эрхлэлтийг дэмжих хөтөлбөрүүдэд хамрагдсан хувиараа бизнес эрхлэгч иргэдтэй гэрээ байгуулан тэдний бараа бүтээгдэхүүнийг борлуулах цэгийг “Саруул” захад нээн ажиллуулж, 11 иргэний 5,460,000 төгрөгийн бараа бүтээгдэхүүнийг байршуулан худалдаалж байна.

            Сүхбаатар дүүргийн Засаг даргын Тамгын газар нь хөгжлийн бэрхшээлтэй иргэдэд зориулж налуу шат, нэг цэгийн үйлчилгээний ТҮЦ машинд брайль үсэг, авто зогсоол, ариун цэврийн өрөө, лифтэнд дуут зарлагчийг давхар бүрт зарладаг байхаар төлөвлөн суурилуулж, угтах хэсэгтээ тэргэнцэр байршуулсан нь Хөгжлийн бэрхшээлтэй хүнд ээлтэй, хүртээмжтэй орчныг бүрдүүлсэн байна.